खास मंडईच्या औचित्याने मौजा सालईटोला (खरपुंडी) येथे न्यू युवा नाट्य कला मंडळ सालईटोला (खरपुंडी) यांच्या सौजन्याने “नखरेल नार नवऱ्याची” या सामाजिक नाटकाचा भव्य नाट्यप्रयोग आयोजित करण्यात आला होता.
या नाट्यप्रयोगाचे उद्घाटन माजी खासदार तथा भारतीय जनता पक्ष अनुसूचित जनजाती मोर्चाचे राष्ट्रीय महामंत्री डॉ. अशोकजी नेते यांच्या हस्ते फित कापून करण्यात आले.
उद्घाटन प्रसंगी बोलताना डॉ. अशोकजी नेते म्हणाले “नाटक हे केवळ मनोरंजनाचे साधन नसून समाजातील विचार प्रबोधनाचे प्रभावी माध्यम आहे. या माध्यमातून समाजातील वास्तव परिस्थितीचे दर्शन घडते.”
पुढे बोलताना म्हणाले “दिवाळीच्या काळात अवकाळी पावसामुळे शेतकऱ्यांचे मोठे नुकसान झाले असून अनेक शेतकरी आर्थिक अडचणीत सापडले आहेत. नुकतेच मुख्यमंत्री मान. देवेंद्रजी फडणवीस अहेरी येथे महिला व बाल रुग्णालयाच्या लोकार्पणासाठी आले असता या संदर्भात मी निवेदन दिले आहे. मुख्यमंत्री महोदयांनी जिल्हाधिकाऱ्यांना तातडीने यावर कार्यवाही करण्याचे निर्देश दिले असून लवकरच निर्णय होईल.”
शेतकऱ्यांच्या व्यथा जाणून घेत त्यांच्यासाठी सातत्याने प्रयत्न करत असल्याचे सांगत डॉ. नेते यांनी नाट्यकलाकारांचे आणि मंडळाचे कौतुक केले तसेच “नाटकातून समाजाला संदेश देणारे उद्बोधन घ्यावे,” असे आवाहन केले.
या प्रसंगी तालुका अध्यक्ष दत्तू सूत्रपवार, गोगांवचे सरपंच तथा अनुसूचित जाती संघटनेचे तालुका अध्यक्ष राजेंद्र उंदिरवाडे, डॉ. बोदेले, उपसरपंच रूषी नैताम, पो.पा. सुधाकरजी मेश्राम, मुख्याध्यापिका खोब्रागडे मॅडम, रमेश नैताम, अवथरे सर, दिनेश आकरे, विवेक भुरसे, अंबादे सर, धीरज रामगिरवार, रवि मोहुर्ले, बाळू मेश्राम तसेच मंडळाचे पदाधिकारी व असंख्य नाट्यरसिक ग्रामस्थ मोठ्या संख्येने उपस्थित होते.
